ثقافة الأكل الصحى



كلما تعرفت على عادات صحية جديدة أو أكلات صحية ، صُعقت من مدى العك الموجود فى ثقافة الأكل المصرية
:D
وللأسف متعلمناش اننا ناكل أكل صحى غير فترة المرض ناكل مسلوق وشوربة خضار،من اسوأ الأشياء أثناء إقامتى فى الرياض إنى مكنتش اعرف انزل لوحدى من البيت اشترى اى حاجة او اتمشى ودى كانت أول مرة فى حياتى اقعد فى البيت فترة طويلة كده ، فطبعاً كان البديل إنى احاول اعمل رياضة بإستمرار وإنى أظبط أكلى عشان اقلل حجم السعرات واحاول اتحكم فى عوامل زيادة الوزن .طبعاً الموضوع مش سهل وبياخد وقت كتير جداً عشان تقدر تغير عاداتك ومش أى عادات دى الأكل !أنا طبعاً مؤمنة ان التغيير ده سهل مش زى م الناس بتقول المهم الإرداة والإصرار ، والأجمل ان يكون شريكك مثلاً موافق على النظام الجديد فمتضطرش تاكل لوحدك او تطبخ مرتين
:D

الموضوع مش بسيط ولازم كل واحد يفكر فى الى بياكله لأن الى بناكله دلوقتى هو الى هيأثر على صحتنا دلوقتى وقدام كمان !
انا عمرى ماكنت اتخيل انى أكل حاجات بقيت بستمتع بيها دلوقتى لأن نظرتى ليها اتغيرت ، عمرى ماتخيلت انى أكل من غير أرز أو مكرونة كبديل ، دلوقتى قليل لما أكل أرز كمان اقدر اتحكم فى الكمية عن الأول بكتير،المقصد مش انك تمنع نفسك م الأكل لكن تغير نوعيات الأكل او تقلل منها قدر الإمكان أو تتحكم فى الكمية واقرأ وابحث عن الأكلات الصحية والخضروات وطرق أكل صحية وجديدة ليه متمسكين بأكلات محددة منغيرهاش ونخاف من التغيير لكن مبنزهقش من الفرجة على برامج الطبخ بدون تنفيذ أى حاجة !

من آثار الأكل المصرى المدمرة مرض القولون ، انا تقريباً مشفتش حد معندوش القولون مريض من سنة كل الناس القولون مبهدلها او هما الى مبهدلينه
:D
انا من اسبوعين مكنتش قادرة اقف بسبب مغص منه برغم إنى قبلها بفترة قصيرة كنت بدأت أحسن من طريقة أكلى لكن واضح ان الموضوع تراكمات ،لكن بعدها قررت فعلاً إنى اتحكم اكتر فى الأكل طبعاً فضلت أكل مسلوق اسبوع واتجنب الطبيخ والمقليات والموالح...

انا فعلاً بستغرب من الأشخاص المرضى وياكلوا حاجات تمرضهم اكتر ، مش عارفة مثلاً ليه الناس الدهون وجلد الفرخة والسمن الى فى اللحمة حرام عليكم الى بتعملوه فى نفسكم ده :D
وليه الأكل يكون فيه ملح كتير وشطة كتير ووو وليه مبنهتمش بتجفيف المقليات من الزيت وليه الحاجة الى مش محتاجة زيت كتير بنغرقها وليه بندخل السمنة او الزيت فى كل الأكل حتى لو مش محتاجة ؟وليه الطبيخ يكون مسبكك قوى؟ليه الخضار لازم يتاكل بدمعة طول الوقت؟ليه ميتحطش ع الرز مرة؟او على المكرونة مرة؟او فى جلاش مثلاً او او ليه مش بنوع فى السلطات او الشوربات ليه ديماً السلطة يعنى سلطة خضراء والشوربة فراخ او لحمة؟ فى انواع كتير ممكن تفتح نفس الواحد على الأكل !
ليه النمطية فى طريقة الأكل أساساً ؟الى بتخلى التجار يغلوا أسعارهم وقت العيد عشان كله عارف ان الناس هتجيب لحمة مثلاً او فسيخ او هيعملوا محشى فيغلوا الكرنب انتوا متخيلين الشعب كله بيفكر فى طريقة واحدة :!
كمان غلّو سعر اللطماطم مأثر مع غالبية الناس مش عشان السلطة لا عشان الطبيخخخخخخخخخخخخخخخخخخ
والتسبيك برغم انك لو بتنوعى فى الأكل هتقدرى تقللى م الطبيخ ده لحد مالطماطم تنزل
:D
دى كانت دعوة للتفكير فى اكتساب عادات صحية واحدة واحدة ومتحرموش نفسكم من حاجة بس الصحة مفيش أغلى منها ...


7 comments:

  1. You know exactly what I think and act towards this :D
    way to go, so happy for you

    ReplyDelete
  2. @sinar طبعاً انتى رفيقة كفاح !

    ReplyDelete
  3. جزاك الله خيرا

    وده كان اتجاهى للفتره السابقه بعد ماجربت الخضار السوتيه والفراخ من غير ماتتحمر وغيره كتير حتى فى ابسط الاشياء

    وان شاء الله الخطوه التاليه انى اقنع خطيبى بده دعواتك معايا

    ReplyDelete
  4. جامد جدا البوست ده
    فعلا الاكل اللي احنا عايشيين فيه هو اللي جايب لنا الكافيه
    الحمد لله اتفقت انا وصلاح ان حياتنا حيبقى فيها تغير كتير من الاسلوب ده
    رغم اني بحاول مع البيت عندي بس لسة بابايا متمسك بفكرة الطبيخ :S

    ربنا يوفقك

    ReplyDelete
  5. @Anonymous
    ربنا معاكى اتقنى بس أكله كويسة وهو اكيد هيحبها

    @TamTam
    لا حاولى فى بيتك بقا بيت الأهل ده مينفعش فيه محاولات
    :D

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore