حين شرح الله صدرى



مر شهر على إلتحاقى بالمعهد العالى للدراسات الإسلامية والحمدلله مستمتعة قوى وأنا بتعلم الإسلام من أول وجديد وكل مااعرف معلومة جديدة بكون سعيدة قوى لكن بحزن فى نفس الوقت على الجهل المنتشر فى ثقافتنا الدينية وللأسف التركيز على بعض الجوانب وإهمال جوانب كثيرة أخرى ، والأسوء من كده اختلاط العادات والتقاليد بالمفاهيم الدينية ونسبها إلى الدين وهيا ليست منه بشىء
.

حسيت اننا لو اتعلمنا الدين صح وعملنا بيه هنبقا بنى آدميين بجد !
حد خد باله مثلاً ان كلمة قرآن مشتقة من قرأ ؟تفتكروا لو فهمنا الكلمة دى صح هل هنفضل متخلفين كده؟

كان دكتور بيحكيلنا عن واحدة أسلمت قالت انها لما قرأت القرآن حست ان قلبها كان وردة مقفولة والشمس جت عليها وفتحتها ، ده الى الى انا حسيته وبحسه كل ماتعلم حاجة جديدة فى دينى ,, ربنا شرح صدرى !

طول عمرى كنت أفكر هل أنا مسلمة عشان اتولدت مسلمة ولا لأنى فعلاً عايزة اكون مسلمة ؟؟ طبعاً مقدرش أجاوب ده غير لما اكون عارفة يعنى ايه إسلام؟ ومع كل معلومة جديدة بتعلمها بحمد ربنا على نعمة الإسلام وأتمنى فعلاً انى اقدر اكون داعية بفعلى للإسلام ، لأن للأسف الفكرة المأخوذه عن المسلمين دلوقتى لا تمت بتعاليم الإسلام بصلة !

كمان من الحاجات المحزنة جداً ان أغلب الكتب الى بندرسها ان مكنش كلها الى كاتبينها مسلمين هنود أو باكستانيين او اجناس أخرى غير عربية وده يدل على ضعف إجتهاد العرب لتأليف كتب باللغة الإنجليزية وكأن مفيش مسلمين مبيتكلموش غير العربية !

ده كمان دكتور قالنا ان الشيعة مجتهدين جداً فى تأليف كتب كثيرة باللغة الإنجليزية عن الإسلام وفروعه ! ربنا يسترها

كانت أمنية حياتى إنى ادخل معهد إعداد دعاة عشان اتعلم الإسلام صح والحمدلله بيدرسلى دكاترة هايلين ومش متشددين خالص من جامعة الأزهر وأتمنى من الله يرزقنى العلم وحب العلم والعمل به والوسطية والبعد عن التشدد..

8 comments:

  1. انا بجد بحييكي علي الخطوه الجميلة دي
    وعجبتني اوي جملة هل انا مسلم علشان اتولد مسلم ولا علشان فعلا انا عاوز اكون مسلم
    الكلمه دي كبيره اوي وحسيتها فعلا

    تحياتي ياباشمهندسه وبالتوفيق في الدراسة

    ReplyDelete
  2. يا رب يشرح صدرنا جميعا وينور بصيرتنا بجد كلالامك حلو جدا بجد انا حاسااه اوى ربنا يهدينا جميعاا يا رب العالمين

    ReplyDelete
  3. ربنا يكرمك ويزيدك من فضله

    ReplyDelete
  4. انا نفسى برضه اخدها بس لما اخلص الكلية ان شاء الله
    و بعدين انتى ممكن كل فترة تنزلى موضوعات هنا فيها حاجات كانت جديدة عليكى او كنتى فاهماها غلط

    ReplyDelete
  5. بجد كلامك جميل جدا
    للاسف انا ف كليه الدراسات الاسلاميه
    بطلت اروح الكليه لانى مش بلاقى حاجه تنفع تتسمع
    كل هم الدكتور انه يقول الكلمتين اللى فى الكتاب وكدا يبقى عمل اللى عليه وياريت يكون فى حاجه فى الكتاب تفيد كله دش
    اهم حاجه نشترى الكتاب عشان نسبه مبيعات الكتاب تعلى وطبعا نسبه النجاح فى الماده تعلى
    انا فى الفرقه الرابعه
    وكل المحاضرات اللى حضرتها فى السنين دى تتعد عالصوابع
    معدوش 15 محاضره
    ياترى العيب فينا ولا ف مين بالظبط

    ReplyDelete
  6. بجد كلامك جميل جدا
    انا فى كليه دراسات اسلاميه
    طبعا الكل هيقول ما شاء الله
    انا هقول على ايه للاسف انا ازهرى
    انا فى الفرقه الرابعه
    وف السنين اللى فاتت دى كلها حضورى للمحاضرات يتعد عالصوابع
    الدكاتره واخدينها تجاره لكتبهم
    اهم حاجه نسبه المبيعات تعلى عشان نسبه النجاح تعلى طبعا
    اؤكد ان مفيش اى استفاده من الحضور
    يا ترى العيب فينا ولا ف مين :-(

    ReplyDelete
  7. كل ما بنعرف حاجة في الدين بحس أن الدين اللي احنا عليه دين ودين الإسلامي ده دين ثاني خالص

    ReplyDelete
  8. ربنا يوفقك بإذن الله وأنتي بتستمتعي بدارسة الدين

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore