الثورة منتهتش


الصورة من عند مريم :)

حد مصدق انا من ساعة ماشفت البيان بجد وحاسة انى قلبى هيقف وفضلت شوية كده مش مجمعة الحمدلله الحمدلله الحمدلله

انا فعلاً حاسة بالنصر شكراً يارب انك مبترضاش بالظلم ،يارب يسرلنا الخير

انا كنت متفائلة ومبسوطة انى كنت متفائلة واعتقد ان اكتر الناس المتفائلة هيا الى حاسة بالنصر :))
لأننا كنا بنكافح عشان ننشر التفائل والإيجابية فى كل المواقف الصغيرة قبل الكبيرة

ثورتنا هتكمل لما نحقق كل مطالبنا ونمشى ايد واحدة فى تعمير بلدنا وتقليل اختلافتنا عشان نتحد فى أهدافنا العالية لمصلحة البلد ، مش مهم مين بيتكلم فى التلفزيون ، مش مهم مين قعد مع الجيش ، الأهم انهم بيعرضوا مطالبنا وانها تتنفذ مش وقت غيرة ونفسنة
ولا وقته تشويه رموز باينة لمجرد اننا بنختلف معاها بدون أدنى اعتبار بإنهم فاهمين وان ده شغلهم فى جزء ما

ليه مننساش اختلافتنا دلوقتى ونحاول نستفيد من كل فرد بغض النظر عن أفكاره ومعتقداته ونستفيد من خبرته فى المجال الى يتقنه وبس؟
كمان مش عايزين ننسى دعم إخوانا العرب الى بيحاولوا يحررو بلادهم : الجزائر ، اليمن ، البحرين

ياريت كل واحد يبدأ بتعمير أسرته ، عمارته ، جيرانه وياريت يدعم أى فكرة صالحة بغض النظر عن مين الى عاملها البلد عايزة شغل كتيييييير قوى الله المستعان :)

6 comments:

  1. متفق تماما بالذات في جزء منخونش بعض ونشتغل على تطوير نفسنا وبلدنا ونسيب الروح بتاعة الميدان دي موجودة ..

    مقال ممتاز.
    Note:
    Something wrong with the post background or it's only me ??

    ReplyDelete
  2. الثيم مبيحملش مرة واحدة للأسف هحاول اظبطه كده :S

    ReplyDelete
  3. أوك بس وجود الناس حاليا في التحرير ملوش لازمة .. أعتقد نرجع ونسيب الناس تشوف شغلها وحده وحده
    عاوز افهم وجودهم دلوقتي معناه ايه!! البلد كدا هتقف
    دا وقت التعمير من جديد .. والتعمير مش وظيفة السلطة بس اللي موجوده دلوقتي اللي هي الجيش او ايا كانت ايه هي لا دي وظيفة كل واحد فينا .. مينفعش دلوقتي كل فئة تطلع وتعد تضغط علي الناس لغاية ما تحقق اللي هي عاوزاه
    اوك كل حاجة تتنفذ بس بالعقل ... يعني نشوف اولوياتنا ايه دلوقتي لان بالشكل دا فعلا البلد هتقف لما كل شوية فئة تطلع وتقول عاوزين كذا وفئة تانية تقول عاوزين كذا وكذا

    كل واحد يبتدي يعمر في اللي حوليه ونسيب المتخصصين هم اللي يبدأو يتحاوروا ويشوفوا مطالبنا

    مش فاهم اعدين دلوقتي في التحرير ليه

    ومحدش يقولي حرية !!

    احنا عملنا بنسبة 95 %من اللي احنا عاوزينه اللي هو كان في ايد النظام السابق
    لكن اللي جاي في ايدنا + في ايد النظام اللي هيبقي جديد اللي هو اصلا لسه مش موجود
    يعني ببساطة نبطل انتهازية وتصفيات حساب ونرجع نبتدي نفكر ونقدم حلول واقتراحات لاعادة البناء مش افضل اعد مكاني لغاية ما كل حاجة تتعمل !!!!!

    دلوقتي معظم المصالح كل شوية اضراب ومحدش هيشتغل وكل واحد مستني تنفيذ مطالبة مش هينفع كدا

    ودلوقتي كل واحد هيبتدي يشكك في التاني ويخون فيه

    لو الناس عاوزه تقيس مقدار حبها لبلدها تبتدي تعمر وتتعلم من جديد اسلوب وفن التعامل مع الاخرين وحقوقه وواجبته ناحية بلده وتبتدي تتعلم وتعلم اللي حواليها ممنوع الرشوات والمحسوبية وكل دا هنتعلمه لما نرجع شغلنا ونشوف مصالحنا من جديد ونبتدي نطبق فعلا

    والا لو النظام الجديد جه واحنا لسه قاعدين مكانا يا اما هنفضل طول عمرنا نخرج في الثورة ومش هنعرف نتوقف امتي
    يا اما هيرجع اسلوب الفساد من تاني

    يارب الفترة دي تعدي علي خير
    وان شاء الله انا واثق في الجيش وربنا يوفقهم ويعينهم للي فيه مصالحنا ان شاااء الله

    ReplyDelete
  4. لا انا معاك جداً مش موافقة على وجود اعتصامات حالياً إلا اذا كان فى سبب منطقى قوى يعنى رفض مطلب من مطالب الثورة ويتعمل مظاهرات وخلاص لأن الدنيا عايزة تتظبط كمان الناس محتاجة تصبر شوية ع القوات المسلحة الناس بيعملو مليون حاجة وانا شايفة انهم بيحاولو ينفذو مطالب الشعب

    يعنى الأفضل الى عنده مطالب يحاول يدور ع سكة يعرض فيها مطالبة بدون إضرار بالمصالح

    ReplyDelete
  5. أختي العزيزة هنادي
    أحببت أن أوضح بأن ما يحدث في البحرين مختلف تماما عن ما حدث في مصر أو تونس..المظاهرات والاشتباكات هذه لا تمثل رأي الشعب البحريني كافة وإنما تمثل المعارضة الشيعية فقط...هذه المظاهرات ليست جديدة..حدثت من قبل في أوائل التسعينيات وبدايات الألفية الجديدة....وظهرت الآن على السطح بشكل أقوى في الإعلام لعلاقتها بالأحداث الأخيرة في العالم العربي..
    أرجو أن تكون الفكرةواضحة الآن عن وضعنا في البحرين..الشعب لا يريد إسقاط النظام..نحن مرتاحون في بلدنا..نعم لدينا مشاكلنا..لكننا لا نريد قلب النظام لإصلاحها وما يظهر في وسائل الإعلام هو جانب واحد فقط..

    ReplyDelete
  6. فعلًا يا هنادي ده وقت كل واحد يبص هيعمل أيه قدام عشان ينهض بالبلد دي
    الحمد لله يا رب

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore