عيد الإستفتاء




امبارح كلنا رحنا الإستفتاء كأننا فى العيد وفرحانين ، ووقفنا فى طوابير من غير تذمر ولا ملل،يمكن لأننا من زمان نفسنا نعمل كده بس دى أول مرة نثق ان صوتنا هيفرق ،وعندنا أمل اننا نقدر نغير بجد الأيام دى.

انا كنت مبسوطة قوى بالتنوع الإجتماعى فى الطابور وان فى ناس من كل الاعمار وناس كبيرة جداً فى السن سواء ستات او رجال،ناهيك عن الإستمتاع بالنقاشات الجانبية .

لكن اسوء شىء هو التحزب الى موجود على الساحة بين فريق نعم ولا،والفتاوى العجيبة بتاعة لو مقلتش نعم عتروح النار وهتقول لربنا ايه والكلام ده ، بصراحة المتاجرة فى الدين دى لازم تقف استغلال جهل الناس لآراء ومصالح شخصية شىء مقزز جداً!
من الامانة انك تعرض وجهتى النظر والشخص الى ربنا اداله عقل يفكر بيه هو الى يختار! واصلاً اصلاً محدش يقدر يثبت ان الى بيقول نعم صح ولا الى بيقول لا صح ، بسبب فقدان حلقات كتيرة مش واضحه وكلام متضارب
كل واحد بياخد قراره على أساس المعطيات الى قدر يجمعها من كلا الطرفين مش عشان حزب ما ينزل الإنتخابات ولا الكلام الفارغ ده

امبارح فى شاب جه يوزع علينا ورق واحنا فى الطابور نقول نعم اتنرفزت جداً ، رحت قلت للظابط وادتله الورق قطعه ورح كلمه من حقه يعلق ع صدره يفطة نعم لكن مش من حقه ييجى يدينى ورقة يقولى قولى نعم انا !

نفس الكلام لأئمة المساجد الى بيحرضو الناس يقولو نعم أو بابا الكنيسة الى بيحرض الناس يقولو لا
انتو وظيفتكم تحرضو الناس على المشاركة وتعرضولهم الآراء بمنتهى الحيادية مش على خط واحد

وأتمنى ان التحريض ده كان يبقا موجود أيام مبارك بس الى فات فات عشان منقلبش كتير فى الماضى :D
اتمنى بجد حوار الإخوان والسلفيين والعلمانين ده ينتهى قريب ونبطل خناقات واتهامات وكل واحد يعلم نفسه أحسن ازاى يتعلم الديمقراطية ويقدر يتعايش مع الناس بشكل مهذب ربنا هو القادر ع توحيد العالم كله تحت راية واحدة لكن اكيد يعنى خلق التنوع والإختلاف لكذا حكمة معتقدش من ضمنها اننا نقطع بعض شتيمة وإتهامات فى الأول والآخر لازم نراعى اننا كلنا مسلمين لازم نحترم بعض اكتر من كده
ونحترم مشاركة أخواتنا المسيحيين فى الوطن لأننا يجمعنا مكان واحد والدين لله والوطن للجميع

قلت نعم قلت لا خلينا نتفق اننا عايزين مصلحة بلدنا رقم واحد وندعى ربنا انه يوفقنا لما فيه الخير والصلاح لنا أجمعين

وكان التوثيق ضرورى لهذا اليوم التاريخى فوثقه غالبية الشعب وأنا منهم بصورة للصوبع البمبى
:D

No comments:

Post a Comment

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore