القصاص ياشعب مصر "يلى متدين "



الحقيقة أنا مش قادرة اتخيل الناس الى بتتكلم عن الشهداء بدم بارد دول بيفكروا إزاى؟
وإزاى احنا مش قادرين نقف وقفة رجالة عشان ناخد حقهم بما يرضى الله
بعد أحداث التحرير الدامية امبارح بدعى ربنا يطول نفس أهل الشهداء لحد مايخدو حق أولادهم وذويهم

انا حقيقى مش قادرة اتخيل اننا باردين قوى كده ياجماعة الناس الى ماات دى مـاتـــت يعنى ممكن ام ملهاش حد غير ابن واتوفى وهو الى كان مراعيها ومونسها فى وحدتها حد حاسس بالست دى دلوقتى عاملة ازاى كل ماتصحى وتبص على أوضته أو مختصاته؟ولا واحدة ملحقتش تتهنى بخطيبها او زوجها وقلبها اتحرق عليه ؟
حد حاسس بحرقة قلب الأم أو الأب الى كان نفسه يفرح بابنه ، حد حاسس بالضيق والكتمة الى بتيجى فى صدرهم من كتر الحزن وهما شايفين العصابة عايشة فى سجن ومستشفى آخر عشر نجوم

حد متخيل ان فى ناس اتقتلت وملهاش علاقة بحاجة زى واحد كان بيمسح وجوه المتظاهرين بخل وخد رصاصه والشاب ده والدته كبيره فى السن ويمكن كانت معتمدة عليه فى حياتها كلها معملش حاجة غير ان فطرته قالتله لازم تساعد أخواتك

والناس الى نزلت عشان تقول لحاكم جائر قتل وأفسد فى الأرض وأورثنا تنظيم فاسد ، ناس نزلت مكانتش جبانة وحكمت ضميرها وفطرتها بما يرضى الله مش قعد يشتم فى الثوار ولا شيخه قاله لا لو مت مش هتبقا شهيد عشان ده خروج عن الحاكم فمشغلش دمغاه وقعد ع الكنبه مع ان شيخه ده هتلاقيه متجوز أربعة وعنده أملاك وأطيان وبياخد م البرامج قد كده

لهو مطحون زيه بلا شغل ولا زوجة ولا حتى علم

لو كل واحد فكر ان كان ممكن اخوه او اخته او زوجته او زوجها او ابنه او والده الى اتقتل كان هيسكت؟
كان هيكتفى بكلمة ربنا يرحمهم وخلاص

مش احنا عاملين فيها شعب متدين طب فين القصاص لدم أخواتنا ليه منقفش مع الاهل دول كلنا
انا بجد طول الوقت بفكر فى الناس ى وبتحرج من نفسى قوى لما افتكر ان الناس دى ماتت عشان تحررنى وانا مقدرتش اعملهم أى حاجة

بس على الأقل على الأقل كل واحد يحاول يشوف أسرة شهيد يراعيها نفسيًا ولو محتاجين يحاول يساعدهم ماديًا
الناس دى لازم نشيلها فوق دماغنا طول عمرنا وعمر ماده هيرجعلهم ضناهم الى مات بس على الأقل نعرفهم اننا مقدرين ومش ناكرين الجميل

بالله عليكم لو اتعمل مليونية ننزل كلنا ونطالب بحاجة واحدة القصاص عشان نار الناس دى تبرد
احنا لازم نتفرج ع صور الشهداء كل شوية ونتفرج على فيديوهاتهم وهما بيتقتلو عشان نفضل صاحيين وعشان نحفز نفسنا ديمًا اننا منسكتش على أى غلط

No comments:

Post a Comment

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore