عودة للنجاح

امبارح عرفت إنى نجحت الحمدلله فى أول سنة دراسة بمعهد الدراسات الإسلامية
طبعًا الإمتحانات دى كانت تحدى كبير جدًا ليا لكذا سبب أولهم إن دى أول دراسة فى حياتى باللغة الإنجليزية ، وأنا أصلًا مش قوية في اللغة فكنت طول السنة بحاول اصلح اللغة بجانب تعلم المحتوى نفسه واتمنى ان السنة الجاية أحسن اللغة اكتر واكتر إن شاء الله

زطبعًا لذة النجاح فى دراسة انت رايحها بمزاجك غير دراسة أجبرت عليها :~
تانى تحدى ان شهر ماقبل الإمتحانات كان عدم استقرار فى حياتى ونقلنا حياتنا للمنصورة وكنت الشهر ده فى بيت أهلى لحد مانلاقى شقة فى المنصورة وكنت بركز بصعوبة فى المذاكرة خصوصًا من أمى مكنتش معترفة بالدراسة تقريبا هههه وكل شوية عيزانى اساعدها فى المطبخ فكانت تشتيت زى الفل
اما شهر الإمتحانات نفسه فطبعًا لان الدراسة فى القاهرة قضيت الوقت ده فى بيت أهل زوجى وهو عشان شغله كان قاعد عند أهلى فكنا مشتتين زى الفل انا فى القاهرة وهو فى المنصورة
:D

التحدى التالت بقا ان أيام الإمتحانات اكتشفت إنى حامل وطبعًا مذاكرة وتركيز مع الرغبة فى النوم ووجود تعب الشهور الأولى والمواصلات كان حاجة زى الفل الحمدلله
:D :D

بس سبحان الله الأيام دى عدت وعشان كده مبسوطة جدًا بالنجاح ، اما للدراسة نفسها برغم اننا مدرسناش كم كبير بسبب ظروف الثورة والمعهد كان بادىء متأخر اصلا بس الى أخدته أفادنى جدًا جدًا وفعلًا وسع مداركى الفكرية وغير كتير من نظرتى واستفدت بشكل فكرى وعلمى الحمدلله ومقدرش انكر جهود الدكاترة وإتقانهم على قد مايقدرو ورغبتهم انهم يساعدونا بأى شكل ربنا يجعله فى ميزان حسناتهم

كل مااتمناه الآن ان ربنا يوفقنى فى السنة الجديدة لان التحدى فيها أقوى لأن لو ربنا تمملى الحمل ده على خير هكون ولدت أثناء الدراسة وانا نفسى اكمل الدراسة بجد الله يعين

5 comments:

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore