الحمل من الشهر الأول للثالث

انا حبيت اسجل تجربة حملى فى أول 3 شهور يمكن حد يستفاد منها ، طبعًا أعراض الحمل مش ثابتة لكل البنات ولا لكل الحمل يعنى ممكن اعراض تحصل فى أول حمل متحصلش فى تانى حمل وممكن أعراض تحصلى متحصلش لغيرى وهكذا ، لكن فى كل الأحول الحمل جهاد فى سبيل الله :) ونحتسب كل الى بيحصلنا فيه لعل الله يجعل فى ميزان حسناتنا
الشهور الثلاث الأولى بها أكبر الفرص لحدوث الإجهاض فعشان كده لازم نكون حريصين فى كل شىء بنعمله فى الفترة دى يعنى المشى مثلًا يكون بهدوء ، شغل البيت يكون بهدوء وبشكل متقطع ، حركة الجسم كلها تكون براحة

نبتدى بأعراض الشهر الأول:

تغييرات فى الضغط : انا مكنتش اعرف إنى حامل طول الشهر الأول بس كان ضغطى بيعلى كتير مع المجهود البسيط والخروج والسفر وبعد كده الدكتور قالى انه ده بيحصل أول الحمل بسبب التغييرات والحل للمشكلة دى انك لازم تقيسى الضغط لانك ممكن تتخيلى انه عالى ويكون واطى او العكس فلو شربت كركاديه مثلا ع أساس انه عالى هيوطى الضغط زيادة .

النوم المفرط : انا تقريبًا كنت بنام 12 ساعة مقفلة وكنت بستغرب جدًا برغم انى مبذلش مجهود لكن ده طلع طبيعى جدًا لأن تغيير الهرمونات بيرهق الجسد وبيحتاج انه يرتاح

آلام فى أسفل الضهر :وده الى خلانى أجرى اختبار الحمل اصلًا لأنى كنت عايزة اخد مسكن فلازم اتأكد انى مش حامل الاول خصوصًا ان الألم استمر معايا اكثر من يوم وده بسبب ان الرحم اربطته بتكون فى الضهر فعند حدوث الحمل بيزيد الضغط فى الرحم وبالتالى يضغط على الأربطة وحل الألم انك تنامى على ضهرك لحد مالوجع يقل وده بيزود فرص ثبات الجنين وإن كنت مش متحملة الألم تسألى الدكتور عن مسكن بالنسبالى الدكتور كتبلى بروفين "لبوس" فى الحمل يفضل اللبوس عن البرشام قدر الإمكان عشان ميتعبش المعدة
.
إدرار البول : بسبب ان حجم الرحم بيكبر فبيفضل يضغط على المثانة وبالتالى بتحتاجى تدخلى الحمام كتير .

سقوط الشعر : شعرى بيقع من أول شهر لحد الآن بسبب نقص الفيتامينات عندى وليه علاج بس مع منتصف الشهر الرابع وفى وصفة بلدى لكن مجربتهاش لسه وهيا دعك الشهر بزيت الزيتون

أعراض الشهر الثانى :

بالنسبالى ده اصعبهم لان المشاكل فيه بتكون أكثر

1- التقلصات والغازات : لأن الحمل بيسبب تغييرات فى الهرمونات فى هرمون منهم بيريح عضلات المعدة تمامًا وبالتالى بتقل عملية الهضم وده بسبب حدوث غازات وتقلصات بالذات لو مظبتيش طريقة الأكل وهى انك تاكلى مثلًا ست وجبات صغيرة بدل 3 وجبات كبيرة لانه بيمثل ضغط ع المعدة فى وجود عسر الهضم مجرد انك تقللى كمية الوجبات هتقل التقلصات تمامًا وكمان الدكتور كان كتبلى برشام فحم "أوكاربون " عشان يمنع التقلصات وده مصنوع من مواد طبيعية فمناسب للحمل

الغثياااااااااااااان : او مايسمى بغممان النفس وده أرخم عرض ممكن تمرى بيه ليه حلول بس أوقات كنت بحس انها فقدت التأثير منها انك تاكلى اول ماتصحى ثمرة فاكهة أو بقسماط او اى نوع كراكرز قبل ماتقومى مالسرير بربع ساعة مثلًا ، وفى كمان انك تاكلى جبنه قديمة او رومى قطعة منها هتهديكى كتير وفى مشروبات زى الزنجبيل بتهدى العملية دى بس فى آواخر الشهر مكنش حاجة بتأثر معايا غير انى افرد جسمى على السرير وده بينتج عنه فقدان للشهية

القىء : ابتدأ معايا بردو فى أول الشهر الثانى أول ماصحى م النوم بشكل يومى بعد كده الدكتور كتبلى على نوعين من اللبوس للغممان والقىء وفعلًا القىء وقف شوية والغممان قل شوية لكن كام يوم ورجعو تانى برغم ان كنت باخد اللبوس بشكل يومى والى عرفته بعد كده م الدكتور ان القىء والغممان اعراض حمل لا يمكن منعها ولكن تقلليها فقط فى ناس ممكن القىء يوصل عندها اكثر من 3 مرات فاللبوس بيحاول يمنع ده ويقلله لمرة او اتنين او تلاتة حتى فبعد ايام وقفت اللبوس لأن حسيت ان ملوش لزوم خصوصا ان كان القىء بيوصل معايا ل3 مرات وطبعًا اللبوس كان بيمسك المعدة جامد مع عملية القىء فكانت عملية مؤلمة لكن ميزة القىء انه بينزل عصارة صفرة كده بتقلل الغممان وكمان القىء بيطمنك على صحة الجنين لأن القىء ناتج من هرمونات التثبيت الى بتحصل فى أول 3 شهور فبيكون مؤشر ان الحمل مستقر الحمدلله
كمان ممكن تحسى انك بتقرفى من روايح معينة او اكل معين ابعديه عنك عشان ممكن يسببلك قىء بالنسبالى حصل مع البيض المسلوق فبقيت اكله مقلى ، وفى الآخر مع الفراخ فبقيت احاول اكلها باى طريقة تريحنى

الشهر الثالث :

اختفى الغثيان تمامًا ، استمرار الرغبة فى النوم ، تغير الحالة المزاجية والقىء مستمر مع فقدان للشهية فظيع وده انتج عنه خصوصًا مع الصيام انى وصلت لمرحلة مش قادرة اقوم من على السرير ولا اعمل اى شىء وطبعًا ده كان كارثة لأنه تعبنى جدًا لدرجة انى كنت بصحى م النوم بوجع فى بطنى م الجوع فطبعًا اضطريت أوقف الصيام وبقيت احاول أكل فاكهة واشرب عصاير قدر الإمكان لحد ماالروح رجعتلى تانى واختفت علامات البهتان من وجهى بشكل تدريجى ومع نهاية الشهر الثالث بترجع نفسك للأكل من تانى وبتقل أعراض كتيربرغم انى بدأت الرابع إلا إن القىء مستمر لكن ع كلام الدكتور كلها أيام ويقف وفعلًا ده من أصعب الى بيحصل للحامل لأنى بحس وقتها انى بطلع فى الروح خصوصًا لو أكثر من مرة

3 comments:

  1. menkom nastafeed :D

    Hope you feel better and better as days go by.

    ReplyDelete
  2. مشكوره يا قمر
    انا كمان لي تجارب بس حبه اضيف حاجه اني كل واحده مش ذي التانيه
    انا كمان حامل بس حملى الاول مختلف كتير عن التاني مع اني نوع الجنين في المرتين واحد

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore