من وحى التسوق للعيد

سؤال قد يبدو ساذج فى بلدنا العزيز بس ليه أسعار الأكل بتزيد قبل العيد؟؟ مش ده نوع من الإستغلال ولا مؤاخذه؟؟
لحد امتى هنبقا تحت تحكم التجار فين حماية المستهلك ياحكومة :@

يعنى انا نفسى افهم لما اشترى صنفين خضار مثلًا ب8 جنيه وصنف فاكهة يقارب عشرة جنيه ده يرضى مين فى بلد مرتباتها كحيانة اصلًأ؟
طيب واحنا الحمدلله قادرين نشترى طب الناس الغلابة مش من حقها تاكل؟ مش من حقها تشترى خضار او فاكهة؟؟
لو افترضنا ان الأكل رفاهية ومش من حقهم ياكلوا لما تكون واحدة حامل واهم حاجة انها تتغذى ومن أسرة فقيرة ذنبها ايه هى ومولدها يطلعوا بأمراض الدنيا عشان مش قادرة تشترى خضار ولا فاكهة؟؟
ولا اغلب رجال الأسر الفقيرة الى هما بيفحتو فى الصخر وفى الآخر مقابل جنيهات فى حين ان غيره قاعد باشا وبياخد آلافات مش من حقه يرجع يرم عضمه بأكله؟؟

امال لو كنا بنستورد الخضار كمان هيتباع بكام ؟ ده احنا حتى بناكل خضار وفاكهة متربين على الغالى على اجمد تشكيلة مبيدات !!

لما كنت بشترى الصبح جرجير وخس وبصل فجبت كمية بسيطة يادوب على قد أسرتى الصغيرة فالست الى بتبعيلى كانت قرفانة منى لما طلبت كيس منها وقالتلى كيس على دول بس مش مستاهلة !

انا تنحت طبعًا انا بشترى كمية قليلة لان الخضرة للأسف بعد 4 أيام بالكتير بتذبل وبتضطر ترميها فقلتلها يعنى اشترى كمية وتبوظ وتترمى مش حرام؟ مردتش عليا وادتنى الكيس بس طبعًا كنت مستغربة ان هنا فى المنصورة وفى بلد أهلى بيكون أحيانًا من العيب ان الواحد يشترى أقل من كيلو او حزمة واحدة من الخضار !!!

فى حين انه مش عيب ابدًا انها تبوظ وتترمى !!

كل حاجة داخلها منظره حتى فى دى؟؟ طب الى على قده بقا وميقدرش يشترى كيلو ونفسه يفرح أسرته بحاجة ينتحر ولا يعمل ايه؟؟ يعنى الناس بره بتشترى بالقطعة الواحدة يدخلوا يشتروا موزة واحدة وتفاحة واحدة دول بقا بخلاء ومعفنين؟؟؟
انا بحب ده فى المولات جدًا ان فى بعض الحاجات مينفعش تشترى منها كمية زى الزنجبيل الطازة مثلًأ وبشترى قطعة واحدة على قد استهلاكى ليه الشائع انى اجيب كيلو او اكثر لمجرد انه ميصحش؟


7 comments:

  1. فليرحمنا الله، وليرحمنا التجار شوية !

    حاجة صعبة فعلًا، ما زلنا نحتاج إلى تغيير داخلي لعادتنا السيئة ! :)

    ReplyDelete
  2. ثقافة الشراء في مصر محتاجة تتغير تماما
    في مصر بنشتري بالكيلو و بالنصف كيلو
    بينما العالم كله بما فيه الكثير من الدول العربية بيشتروا الخضروات و الفاكهة بالواحدة
    دي ثقافة و لابد من تغييرها
    تحياتي

    ReplyDelete
  3. والله عندك حق انا ديما بقول ان مشكلتنا اننا بنتكسف من حاجات ما تكسفش و المصيبة اننا ما بنتكسفش من حاجات تكسف

    ReplyDelete
  4. بغض النظر عن البوست
    حبيت جو المدونة جدا
    حميمي وخفيف ويمتليء ثقافة ايضا
    تحياتي

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore