هل لديك قائمة الأمنيات أو ؟Wish list


من حوالى 5 سنين كنت بقرأ العادات السبع للأشخاص الأكثر فاعلية ووقتها قررت إنى اكتب قائمة أمنياتى وتقريبًا من يومها ماكتبتش حاجة :)

بقالى 5 سنين بدور على نفسى ولسه مش لاقياها او بلاقى أجزاء صغيرة منها ومنتظرة إنى أقدر اركب الصورة النهائية لنفسى قبل  ماأموت :)

كنت كل ماحس بتوهان افتح أجندتى وأشوف أمنياتى الى اتحققت وافكر نفسى بيهم من جديد اكتشفت انى حققت أغلب مافيها فعلًا وان محتاجة أضيف أهداف وأمنيات جديدة تتماشى مع تفكيرى حاليًا 

بجد إحساس جميل لما تحقق حاجة كان نفسك فيها بس الأجمل ان يكون عندك دائمًا أهداف مستمرة ومرنة وكبيرة لأن لما بتفضل تكتب أهداف صغيرة وتحققها بتقعد تفكر ها المفروض اعمل ايه بقا؟
 وممكن تدخل فى دوامة لحد ماتعرف انت عايز ايه هتاخد منك وقت وطاقة مهولين اكتشفت ان اكبر هدف ححققته احتاج سنتين وهو دراستى الشرعية لكن محطتش غير هدف واحد مختاج وقت اكبر من كده

كتير بتجيلك أحلام وأفكار وأهداف ومبتكتبهاش بيمر الوقت بتنساهم وممكن تيجى بعد فترة كبيرة تقول ده انا كان نفسى فى كذا ونسيت وتكون ماشى من غير سكه تخبط فى كل حاجة شوية 
اسوء إحساس لما تيجى فى نهاية اليوم تشوف عملت ايه فى يومك وتلاقى صفر تويتر وفيس بوك بس 
مابالك بالأسبوع ؟ الشهر؟ السنة؟

لما بنكتب قائمة أمنيات بتحس براحة قوى لان بنلاقى سبب نعيش عشانه نتحمس عشانه ووكمان بتوفر عليك مجهود التفكير فى الوقت الى انت مجهد فيه ذهنيًا انك تشوف انت عايز تعمل ايه 

مثلًُا انا كتبت انى نفسى ادرس فى معهد إعداد دعاة لما كان عندى وقت حاولت احقق الهدف ده فى أصعب فترة فى حياتى كان عندى اكتئاب ومكنتش قادرة اروح اقدم لولا دفع زوجى ليا بعدها تنقلت فى السكن وابتديت الدراسة والأمور مشيت تمام وقت الإمتحانات نقلت السكن مرة تانية خارج المحافظة وعلى حظى اكتشفت انى حامل فمكنش قدامى بديل غير انى اسافر وادخل الإمتحان 
فى السنة التانية كنت فى شهور الحمل النهائى ولازم اروح مرة كل شهر اشوف الامور ماشية ازاى وولدت وكنت مضطرة انزل الامتحانات بطفلى فى شهر 6 وأقعد شوية عند اهل زوجى فى القاهرة عشان مش هينفع اسافر المنصورة كل يومين

الخلاصة لو انا مكنتش محددة لنفسى الهدف ده مستحييييييييييييل انى كنت هحققه فى الوقت ده لان كنت هلاقى طول الوقت عذر يخلينى أجله والاعذار مبتنتهيش ولو فضلت تأجل خطوات هدف لحد مالظروف تبقا مناسبة يبقا عمرك ماهتحققه لكن فعلًا عن تجربه انك لو شايف الظروف مش مناسبة ابدأ خطوات صغيرة وربنا بيعين فعلًا انا كتير لما افكر انى كنت بذاكر وانا حامل ووالدة مبصدقش انى عملت ده بسبب كمية الإحباطات النفسية الى كانت جوايا انى مش هقدر اعمل ده والكسل مفيش اسهل منه لكن انك تدفع نفسك وتدفع الشيطان فى نفس الوقت هو ده الجهاد الحقيقى 

الخلاصة ابدأ بتحقيق أحلامك ولو بخطوات صغيرة زى مابيسموها baby steps  وافتح قايمة أحلامك بشكل دورى وحاول تدون أفكارك قدر الإمكان اول ماتخطر بذهنك 
:)

12 comments:

  1. This comment has been removed by the author.

    ReplyDelete
  2. معاكي حق في كل حرف كتبتي
    فمن المهم أن تبدأ بتحقيق أحلامك ولو بخطوة واحدة صغيرة ولكن الأهم أن تستمر مهما كانت الظروف تشكل حجر عثرة

    تحياتي لمدونتك المبدعة
    حكاية

    ReplyDelete
  3. دايما بتكوني نقطة الامل لما طموحي بينام
    مستنية اسمع اسمك من قادة الأمة ان شاء الله

    ReplyDelete
  4. موضوع ممتاز جدااً....ونتمني لكم التوفيق الدائم
    umzug-umzug
    wohnungsräumung wien

    ReplyDelete
  5. بالفعل .:":. الجبــال من حصى
    انا كان حلمي حلم حياااتي بجد النجاح بدراستي
    لكن ظروف سوريا والوضع ما سمح لي
    بجد تضايقت كتيييييييييييييييييييييير
    لكن اول ما يتحسن رح كمل ان شاء الله ولو بعد حين .:":.
    ورح ادرس سنة لاكمل الثانوية بخير والجامعة ان شاء الله
    .
    .

    ReplyDelete

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore