عيد ميلاد نادى صحبة كتاب :)

بعد مرورى بتجربة الحمل والولادة وهى فرصة ذهبية للأسئلة الوجودية من نوع هى دى اخرتى ؟ هقعد فى البيت وخلاص؟ هو ايه الى انا عيزاه من حياتى؟؟ انا مش لاقية نفسى ؟ وبما ان الواجد روحه بتبقا فى مناخيره بسبب التغييرات المهولة الى بتحصل فى حياته بتبقا فرصة مناسبة للمرور باكتئاب مابعد الحمل واكتئاب فى اى وقت :)

انا متفهمة جدًا انى هضحى سنتين من حياتى رعاية تامة لإبنى وبعدها ابدأ اشوف نفسى لكن كل تفكيرى كان ازاى اخلى حاجة صغيرة متأثرش على اهتمامى به وفى نفس الوقت تديلى شبع فكرى وتهدينى شوية ان مازالت بتطور

كنت بحاول اتحدى القالب التقليدى لأى واحدة بتخلف ان كل حياته تبقا العيال وابو العيال وهى مش موجودة ولأنى مش عارفة بالظبط ايه الى ممكن اعمله بدات رحلة البحث عن إلهام وهى مثلث هرمى كدا بيبدا بزوجى مرورًا بأصدقائى المقربينن وينتهى بحضور اى فعاليات مناسبة

وتميم عمره شهرين كدا حضرت ندوة عن الفلك جديدة من نوعها اهو الواحد يشغل دماغه ولفت نظرى انه نادى محبى الفلك  دول عبارة عن مجموعة بسيطة من الناس مهتمين بحاجة بيعملو ندوات كل فترة وخلاص عجبتنى الفكرة وقعدت افكر ليه معملش حاجة زى دى لفكرة انا مهتمة بيها واهو بيبقا نشاط مفيد ويشجع الواحد فجاتلى فكرة نادى كتاب :)

لكن مقلتش هعملها دلوقتى ,, بعدها حضرت فعالية يوم القراءة فى جنينة حقوق - جامعة المنصورة كنا بنجيب كتاب ونروح نقراه تشجيع لفكرة القراءة وقلت لأصدقائى  انى فكرت فى نادى كتاب وشجعونى جدًا على الفكرة برغم انهم كانوا 3 مثلا واحدة منهم الى استمرت لكن تشجيعهم ليا هو الدافع الأكير الى خلانى ابدا بتنفيذ الفكرة

بدأت اشوف صحباتى المهتمين بالموضوع وبدأنا أول لقاء فى نهاية شهر خمسة وبفضل الله استمرينا فى مقابلتنا لحد الآن :)

بجد انا مش قادرة اصدق ان النادى مر عليه سنه وانا حضرت كل اللقاءات وده كان تحدى بصراحة فى وجود طفل فى رقبتى زى تميم :D

ممتنة بنجاح الفكرة لكل عضوات النادى الموجودين والى مشيوا ممتنة لكل الى اعتبر الفكر فكرته وبقا يحاول يحسن فيها ممتنة لل3 الى بكلمة تشجيع عادية قالوها غيرت فى حياتى فى ناس كتير بتهدم بكلمة
"إيمان الباز - ميادة إبراهيم - إيمان فاروق "

بستمتع جدًا بمنظور كل شخص فى النادى واختلاف رؤية كل واحد لموقف او أمر ما فى الكتاب او فى شخصية الكاتب
النادى فتح نفسى على القراية جدًا وده التزام كان صعب جدًا خاصة فى اول سنة امومة لان لما بدأنها كان تميم 3 شهور وكان حياتى ملخبطة ومكنتش بعرف اقرأ كان ساعات المساوامة مابين قراءة او غسيل مواعين وفى أوقات كنت بمشيها يوم ويوم اه والله

النادى خلانى على الأقل بقرا كتاب واحد لكن بعدين فتح نفسى بقيت بقرأ اتنين مع بعض مثلًا

انك تتعلم تحترم اختلاف أراء الى حواليك وتحاول تشوف الحاجة من كذا ناحية وتوسع دماغك اكتر واكتر وتستفيد من قرائتك لنفسك فقط لقراءة من اجل تبادل أفكار مع الآخرين

انا بحمد ربنا على وجود النادى فى حياتى وبحمد ربنا على صحبة النادى الى بجد بتعلم منهم كتير  والى لولاهم مكنش فيه نادى :) كلام تقليدى انا عارفة بس حقيقى
بجد انا كل مرة برجع من لقاء النادى نفسى بتتفتح على الحياة ممكن مشروع صغير وعددنا مش كبير بس بنستفاد كتير قوى قوى قوى حتى لو الى حضروا 2 بس :)

الأفكار قوة لا يستهان بها

فالحمدلله على الصحبة الطيبة والحمدلله على نعمة القراءة

عضوات النادى ربنا يدخل السرور عليكم زى مابتدخلوه عليا كل مرة بنتقابل واحس اننا بنعمل حاجة مفيدة فعلًا :)
وزوجى الحبيب شكرًا لدعمك :)



No comments:

Post a Comment

 
لـلـرغـى فـنــون - Blogger Templates, Wordpress Templates Free - by Templates para novo blogger HD TV Watch Entourage Online. Featured on Local Business Singapore